РУСКИ КЕРЕСТУР/КОЦУР – Шестри Служебнїци Непорочней Дїви Мариї нєшка починаю штиродньове означованє 125-рочнїци снованя своєй заєднїци, як и 70-рочнїци своєй Вице-провинциї св. Осифа у Сербиї, дзе буду мац рижни програми. Законченє шветочносци, як централна програма, будзе на нєдзелю, 19. марца, на Архиєрейскей Служби Божей у Руским Керестуре у Катедралней церкви св. оца Миколая, а Служба почнє на 10 годзин.
Нєшка ше у Провицнийним доме у Керестуре шестри стетню зоз свою ґенералну шестру Терезу Слота з Риму, буду мац духовни науки и заєднїцки молитви. На ютре, 17. марца, иду на паломнїцтво до Крижевцох, дзе 1906. року почали свою мисию на тих просторох, а там буду мац стретнуце и з крижевским владиком Николом Кекичом.
На соботу, 18. марца, духовна програма будзе тиж у Провинцийним доме у Керестуре, а пополадню будзе предлужена у Коцуре, дзе на 15 годзин у сали Месней заєднїци будзе промоция фото-моноґрафиї „Сто роки шестрох Служебнїцох у Коцуре”.
После промоциї, на теметове у Коцуре будзе молитва за покойни шестри и добродїйох о. Андрея Лабоша и Дионизия Дороґхазия, а на 17,30 Вечурня у герекокатолїцкей церкви. На шицки подїї у Коцуре поволани и парохиянє и шицки заинтересовани.
Як за Рутенпрес гварела провинцийна ш. Мартини Кмита, Архиєрейску Службу Божу у Керестуре на нєдзелю, 19. марца будзе предводзиц папски нунций у Сербиї монс. Лучияно Сурияни, вєдно з нашим апостолским еґзархом, владиком Георгийом Джуджаром, крижевским владиком Николом Кекичом, скопским владиком Киром Стояновим, а можлїве же на Служби буду и дзепоєдни други владикове. Тиж так, обчекує ше и приход велїх священїкох и вирних.
Приход наявели и провинцийни шестри зоз Словацкей, з України, провинцийни шестри Василиянки з Горватскей, монахи Василиянє з України и други.
У рамикох рочнїцох будзе означени и особни ювилей – 60 роки монашского живота ш. Вероники Гралюк, котра родом з Босни, длугорочней настоятельки, донєдавна и провинцийней настоятельки, а котра тераз пребува у Руским Керестуре.