– Таке нєприкладне справованє нє шмеме допущиц – гуторел груби глас, моцного хлопа у рокох.
– Тот ше одшмелєл потупиц огранїченя – предлужел, указуюци на поганьбеного хлапца. – Одвше вам гуториме же ше муши писац з писанима буквами, а нє друкованима. Шицки огранїченя здумани же би вам указали як треба же бисце ше справовали, робели и роздумовали.
Млади уха хтори тото слухали прилапйовали тоти информациї як єдини можлїви способ думаня. Шицким твари були озбильни, хрибти випросцени, теки отворени, клайбаси застругани и руки на лавки.
После длугокого монолоґу о тим цо ше шме, а цо нє, почала бешеда о составу хтори кажде з нїх муши написац.
– Як цо сом гварел, состав мушице здумац сами, ту муши буц виражена ваша креативносц. Алє, запаметайце, способ писаня, словнїк и рядошлїд точно одредзени! Од того ше нє шмеце оддалїц – толковал далєй тот исти.
Зявела ше єдна рука дзвигнута понад главу, хтору такой замерковал тот цо до теди єдини бешедовал.
– Можеш повесц цо ши сцела – гварел. На тото преволанє, дзивче цо дзвигало руку, стануло.
– У тим нашим составе можеме описац прешвеченосц зоз кнїжку хтору зме читали прешлого тижня? – питала ше.
– Можеце, алє о тим сце уж писали прешлого тижня. Майце дакус ориґиналносци. Ма ище дахто предкладанє? – зоз швидким обрацаньом глави пробовал ґлумиц глєданє тот, цо бул авторитет. За тот рух вон думал же є гумористични и же пре ньго викладаня нє допити.
Ище єдна рука ше зявела у воздуху.
– Можеме писац о фодбалу? – питал ше єден з хлапцох. Шицким хлапцом ше на твари зявела надїя же нашли тему за писанє.
– Анї най сце нє подумали на таке дацо! – нагнївано их опомнул старши чловек.
– Можеме писац о уметносци? – опитало ше друге дзивче, после дзвиганя руки.
– Може. То добре роздумованє. О чим ши точно сцела писац?
– О поезиї, о писньох, о любови – предлужела.
– Цо, о любови?! Нє, нє. О таких нїзкосцох нє мож писац – после даскелїх секундох предлужел. – Ма ище дахто даяку идею?
– Можеме писац о уметносци мальованя? – опитал ше хлапец споза шицких, без дзвиганя руки. После заинтересованого попатрунку, того цо дава слово, предлужел. – Була внєдзелю вистава алтернативних малюнкох. Можеме о тим писац?
– Як?! О таких нєприкладних стварох сцеш писац?! – поставел тоти реторични питаня розчервенєти главни медзи нїма.
– Алє тот уметнїк достал награди у иножемстве и … – пробовал потолковац тот цо розпочал тему.
– Нє интересує ме! Ви нє шмеце на таки способ роздумовац. Прецо нїхто нє предклада нїч родолюбиве? Спомнїце биду у хторей жили вашо предки. Пишце о чежких роботох на полю.
Тирвала добри двацец минути бешеда о темох. То бул ознова ище єден монолоґ у хторим ознова було опоминаня цо ше шицко нє шме. Точно описани деталї хтори муша буц спомнути у теми хтору виберу.
– Маце шлєбоду виберац о чим будзеце писац – виводзел заключеня на концу монолоґа, о темох за писанє, пан главни. – Мушице буц креативни. Хаснуйце свою главу и напишце так як думаце же треба.
Зоз тим закончена бешеда. Младим розумом було чежко розумиц контрадикторносц у тим шицким.