КУЛА – З нагоди означованя 72-рочнїци ошлєбодзеня Кули у Другей шветовей войни, у Городским парку дата почесц шицким погинутим борцом НОВ и ошлєбодительом Кули, а венци на памятнїк Погинутому борцови положели делаґация Општини, представителє Здруженя борцох НОВ Кула, Здруженя пензионерох, Здруженя русийско-сербского приятельства „Шерцо”, Кола сербских шестрох и представителє Општинскей орґанизациї Комунистичней партиї Кула, а присуствовали и други почитователє здобуткох НОВ.
У мено Општини Кула венєц на памятнїк (робота Стевана Боднарова) положели предсидатель Општини Перица Видеканїч, предсидатель Скупштини општини Велибор Милоїчич и покраїнска посланїца и началнїца Оддзелєня за дружтвени дїялносци Драґана Потпара. Чолнїки Општини визначели же чуванє памятки на антифашистичну борбу обовязка шицких ґенерацийох, а з тей нагоди наявели и же, у рамикох реконструкциї Крамеровей улїци, пошвидко будзе реновирана и площа у Городским парку.
На сходзе бешедовал и секретар Комунистичней партиї Кула Филип Пронек, котри визначел же антифашизем нє идеолоґийне, анї нє политичне прешвеченє, алє глїбоке людске опредзелєнє за мир и шлєбоду, а процив нацонализму, мержнї и расизму. Антифашизем, у сущносци, гуманистична идея, хтора ше заклада за безкомпромисни одпор злу и нєправди, гварел Пронек на вчерайшей шветочносци у Кули.
