Бикичанє и Митровчанє швето означели вєдно

автор влдї
1.1k Опатрене

БИКИЧ – У Доме култури у Бикичу подручни канцелариї (ПК) Националного совиту (НС) Руснацох з Бикичу и Сримскей Митровици  вчера вєдно, з пригодну програму означели националне швето Руснацох у Сербиї.

У програми участвовали члени домашнього Културно-просвитного дружтва „Иван Котляревски”, як и Руснаци зоз Сримскей Митровици, а програму отворели наймладши, котри одшпивали даскельо коляди.

На програми зоз шпиванками участвовали Шпивацка ґрупа „,Бикичанки” и Мишана шпивацка ґрупа домашнїх, а з венчиком шпиванкох госци зоз Сримскей Митровици.

О насельованю Руснацох на тоти простори, як и до Бикичу, през текст хтори пририхтал о. Владимир Еделински Миколка, присутних упознали Зденко Лазор, Весна Данчелович и Деян Бобаль.

Лазор пречитал и писню Михайла Ковача „Руснакова мац”, а свою писню „Руска мац” пречитала Невенка Бобаль.

Попри Бикичанох и Митровчанох, на шветочносци присуствовали и подпредсидателька НС Руснацох Наташа Еделински и член НС Юлиян Ковач, парох у Шидзе и декан сримски о. Михайло Режак, парох у Сримскей Митровици о. Владислав Варґа, парох у Беркасове о. Владимир Еделински Миколка, а спред локалней самоуправи началнїк Општинскей управи Шид Ромко Папуґа.  

Бикичанє и Митровчанє швето того року означели вєдно

ПОВЯЗАНИ ТЕКСТИ