Буджет инвестицийни и социялни

автор зам
894 Опатрене

КУЛА – Скупштина општини Кула з векшину гласох одборнїкох владаюцей коалициї вчера вигласала буджет Општини за 2015. рок, з амандманами хтори дала Општинска рада, а у толкованю, заменїк предсидателя Општини Велибор Милоїчич визначел же буджет першираз правени по програмно-проєктним моделу, цо од тераз будзе обовязка на шицких уровньох власци.

Милоїчич наглашел и же буджет инвестицийни, понеже з власних средствох, з месних самодоприносох по местох општини, та зоз средствох з висших жридлох, за инвестициї у идуцицм року у кулскей општини предвидзени вєдно 260 милиони динари.

Визначене же, и попри тим же є дакус зменшани у одношеню на прешлорочни, буджет за идуци рок и социялни, бо анї єдно социялне даванє нє зменшане, даєдни и звекшани, и за тоту обласц вєдно опредзелєни 85 милиони 630 000 динари. И Милоїчич и предсидатель Одборнїцкей ґрупи векшинскей Сербскей напредней странки Перица Видеканїч наглашели же шицко цо плановане будзе и витворене. Тиж так, Як гварел Милоїчич, од початку рока на буджету ше будзе ище робиц, та наявел и вецей ребаланси у 2015. року.

Цалосни приходи Општини Кула у 2015. року плановани на милиярду 217 милиони 494 000 динари, цо за дацо вецей як 9 милиони менєй як прешлого року, а буджетски дефицит будзе 57 милиони 862 000 динари.

Як то по нових предписаньох, буджет творени на основи 15 програмских цалосцох, а то Локални розвой и просторне планованє, Локални комунални розвой, Розвой туризму, Розвой польопривреди, Защита животного штредку, Драгова инфраструктура, Предшколске воспитанє, Основне образованє, Штреднє образованє, Социялна и дзецинска защита, Примарна здравствена защита, Розвой култури, Розвой спорту и младежи и Локална самоуправа, а кажда програма ма ношителя за єй реализованє. Проєкти ше будзе витворйовац прейґ компетентних явних подприємствох и установох.

О Предлогу буджету на Скупштини водзена вецегодзинова розправа, дзе одборнїки з опозициї пригваряли же одвичательни за вивершенє буджету, предсидатель Општини Драґан Трифунович, нє присуствовал на схадзки и нє токовал буджет, же мало средства предвидзени за Червинку, а вязано за инвестицийни укладаня, найвецей питаня було коло вибудови драги Сивец-Крущич.

Малочислени одборнїки опозициї котри вчера присуствовали на схадзки нє гласали за буджет, а пред Одлуку о буджету за идуци рок, информативно винєшене витворенє тогорочного, од януара по конєц септембра, дзе гварене же у тим периодзе општински буджет витворени з дацо вецей як 59 одсто.

На схадзки наглашене же Општина Кула до идуцого року уходзи без длуствох, односно до конца рока буду вимирени шицки рахунки за чечуци трошки, крем за струю и воду, пре постояцу систему плаценя.

ПОВЯЗАНИ ТЕКСТИ