ҐОСПОДЇНЦИ – Ґосподїнчанє Преображенє Господнє преславели пияток, 19. авґуста, на Служби Божей хтору служел о. Борис Холошняй зоз Бейчу и хтори з тей нагоди пошвецел овоц.
У своєй казанї о. Борис поволал вирних же би були учашнїки нєбесней стварносци.
– Преображенє Господа нашого Исуса Христа, то момент кед його три ученїки, Петро, Йоан и Яков видзели Христа зоз пророками Мойсейом и Илийом, видзели Исуса у його божественей стварносци, а ми маме наказовац и преношиц другим тоту славу – гварел о. Холошняй.
Отец Борис Холошняй у Дюрдьове и Ґосподїнцох будзе до 4. септембра, кед ше враца до Бейчу, а заменює управителя ґосподїнскей парохиї о. Михаила Холошняя, хтори на одпочивку.