КОЦУР – Всоботу пополадню, у порядним обиходу утвердзене же коцурска станїца за одбрану од каменцу, хтора ше находзи у хотаре спрам Кули, обита и очкодована. Урядово утвердзене же зоз станїци нїч нє однєшене, алє направена материялна чкода.
– Видно же вандалє жадали однєсц шицке желєзо зоз станїци, алє их цошка претаргло у роботи и сцекли, та до конца нїч нє однєсли. Чкода барз велька и до дальшого станїца нє годна функционовац – толкує референт на станїци Любомир Русковски.
Утвердзене же розобрана пантлїка з громобрану, та є вецей нє безпечна за роботу. Тиж так, розвалєни шицки клатки, а з лансеру за процивкаменцово ракети витаргнути дроти, та є лансер послати до центру за процивкаменцову защиту до Байши.
Ище вше нє познате кеди станїца знова предлужи з роботу.