Велька Ноц у Руским Керестуре

автор мст
1.4k Опатрене

РУСКИ КЕРЕСТУР – Воскресенє Исуса Христа по григориянским календаре керестурска парохия преславела з нашим апостолским еґзархом за грекокатолїкох у Сербиї владиком Георгийом Джуджаром, котри вчера предводзел Архиєрейску Службу Божу, як и пасхални богослуженя хтори почали всоботу вечар пред Вельку ноцу – на 20 г. Всеночне, Воскресну Службу Божу и Воскресну утриню.

Вчера, на Вельку ноц, рано на 8 г. у Катедралней церкви служена Мала Служба Божа, на 10 Архиєрейска, а з владиком, кир Георгийом, сослужели домашнї священїки – парох о. Михайло Малацко и капеланє о. Владимир Медєши и о. Михайло Шанта, як и парох коцурски о. Владислав Рац. Шпивал Мишани хор керестурскей Катедралней церкви и Дому култури, хторому дириґовала Лидия Пашо, а по традициї, швичкаре були члени Здруженя ремеселнїкох.

Владика и священїки читали євангелске читанє на церковнославянским, латинским, греческим, руским, українским язику и на горватским язику.

У своєй казанї владика наглашел же нам Христос зоз своїм воскресеньом одкрил драгу до вичного живота и отворел дзвери до раю. Воскресенє Христово то радосц и ґаранция и нашого воскреснуца.

Владика на окремни способ винчовал Вельку Ноц тим цо нє могли присц до церкви и подзековал нашим медийом же провадза церковни живот и преноша Слово Боже.

По Служби Божей владика и священїки пошвецели паски у церковней порти дзе ше, и попри досц жимней хвилї, назберало вельке число домашнїх и їх госцох.

З нагоди Велькей ноци, у просторийох парохийного Каритасу пририхтана и пригодна вистава.

ПОВЯЗАНИ ТЕКСТИ