НОВИ САД/ВОЙВОДИНА – Внєдзелю вечар на териториї цалей Войводини вельки дижджи спричинєли чкоди у обисцох, улїцох и на польох. По податкох Републичного гидрометеоролоґийного заводу, на цалей териториї Нового Саду того вечара за осем годзини спадло од 80 до 90 литри дижджу по квадратним метеру, а штреднє количество у маю виноши 60 литри.
Прето Штаб за позарядово ситуациї Нового Саду преглашел порядну одбрану од вилївох на териториї Городу, а позарядову на найкритичнєйших територийох – у Ковилю, Клиси, Сланей Бари и Видовданским населєню, дзе вода вошла по пиньвицох. Медзитим, уж вчера у векшини часцох Городу ситуация була под контролу, лєм у Футоґу и Ветернику було критичнєйше, дзе на дзепоєдних драгох вода ище стала.
На вчерайшей конференциї за новинарохгородоначалнїк Нового Саду Милош Вучевич указал и на нєодвичательне справованє дзепоєдних гражданох, котри свойо септични дзири поприкапчовали на атмосферски канали, та у дзепоєдних часцох городу причини за вилїви були субєктивни.