ВЕРБАС – У Вербаше вчера, 20. октобра, означени Дзень општини Вербас и Дзень ошлєбодзеня, а шветочносц почала на 9 годзин з кладзеньом венцох на Памятнїк погинутих борцох на Городским теметове у Вербаше.
После на теметове, делеґация на чолє з предсидательом Општини Вербас Миланом Ґлушцом венци положела на Памятиїк погинутих борцох у войнох од 1991. по1999. рок, як и на Памтнїк погинутих борцох Червеней армиї. На концу, венци положени и на Памятнїк погинутих борцох у центре Вербасу, дзе була и пригодна програма, у хторей участвовали хор ОШ „Петар Петрович Нєґош” и рецитаторе з ОШ „20. октобер”.
Попри делеґациї Општини, венци на Памятнїк положели и делеґациї Амбасади України, Општинскей орґанизациї Здруженя борцох НОВ, Медзиопштинскей орґанизациї цивилних инвалидох роботи, Здруженя борцох НОВ з Герцеґ Нового з Чарней Гори, Здруженя борцох НОВ Нового Саду, Зомбора, Србобрану, воєних ветеранох Вербас, Здруженя антифашистох и антифашистичних борцох Вуковару, Дружтва сербско-русийского приятельства „Род” з Вербасу, Националного совиту Чарногорцох, ОШ „20. октобер”, та делеґациї општинских одборох СНС, СПС, ПЗПС и СДПС.
Опрез памятнїку присутним бешедовали предсидатель Општини Вербас Милан Ґлушац, предсидатель Здруженя борцох НОВ Вербас Велько Милович, предсидатель Здруженя борцох НОВ Герцеґ Нового Михайло Килибарда, предсидатель антифашистох Вуковару Лазар Дьокич, предсидатель Городского одбору Здруженя борцох НОВ Вербас Милан Вукелич и предсидатель Покраїнского одбору Здруженя борцох НОВ Светомир Атанацкович.
На Шветочней схадзки Скупштини општини (СО) Вербас з нагоди ювилейох, хтора отримана у Биоскопе „Югославия”, госцох привитала предсидателька СО Вербас Марияна Мараш, а предсидатель Општини Милан Ґлушац присутних упознал з новима инвестициями у вербаскей општини и планох за наиходзаци период. Приказани и кратши филм о поробеним у вербаскей општини медзи двома преславами шветох.
На Шветочней схадзки уручении Октоберски награди Општини Вербас, хтори того року достали началнїк Одзелєня за трауму першох Клїнїки за гирурґию першох Институту за плюцово хороти Сримска Каменїца доц. др Милорад Бєлович, декан Факултату спорту и физичного воспитаня у Беоґрадзе проф. др Владимир Копривица и Служба наглей медицинскей помоци Дому здравя „Велько Влахович” Вербас.
На концу отримана културно-уметнїцка програма, на хторей участвовали Хор „Бачки шпиваче” и Клуб рецитаторох Културного центру Вербас, а попри госцох зоз сушедних и других општинох у Сербиї, на Шветочней схадзки и академиї присуствовали и делаґациї општинох и здруженьох борцох з Чарней Гори, Републики Сербскей и Горватскей. Медзи госцами були и народни посланїк Иґор Бечич, подпредсидателька Скупштини АПВ Александра Дянкович и подпредсидатель Покраїнскей влади Иван Дьокович.
У рамикох означованя Дня општини Вербас и Дня ошлебодзеня, вчера вечар у Ґалериї Културного центру Вербас отворени „Єшеньски подобови салон 2016”.