КОВАЧИЦА – У Ґалериї наивней уметносци у Ковачици отворена вистава олєйох на платну шветово познатей наивней уметнїци з того места Зузани Халуповей, з нагоди 90- рочнїци єй народзеня. Нащивителє за мешац, кельо тирвац вистава, годни опатриц 60 ориґинални роботи Халуповей.
– Окрем малюнкох, на вистави виложени и документи з єй живота, кнїжки упечаткох з єй хижи, фотоґрафиї, та писма од значних особох зоз жеми и швета з котрима ше дописовала – гварела директорка Ґалериї Мария Распир.
Малюнки Зузани Халуповей ше находза у рижних ґалерийох и приватних збиркох ширцом швета, а на терашнєй вистави су подзелєни до вецей циклусох – вязаних за словацку традицию и обичаї, за мотиви з Библиї, а треци пошвецени ромскому народу.
Понеже уметнїца була и вельки донатор, окремна цалосц вистави и єй дарунки УНИЦЕФ-у, УНЕСК-у, та Червеному крижу у Женеви.