НОВИ САД – З новим школским роком вишла и нова „Заградка”, тераз як двочисло за авґуст и септембер, у хторей главна тема Лєтня школа руского язика у Попрадзе, у Словацкей. Окрем фотоґрафиї на рамику, 10. и 11. бок тиж пошвецени тей подїї.
Як було на Маскенбалє у рамикох „Дньох керестурскей паприґи”, на Подобовей колониї „Стретнуца у Боднарова” у Ґосподїнцох, на манифестациї „Под корунами на Штранду” и на Фестивалє „Веселинка” у Новим Садзе, на Ноцним турнире у малим фодбалє у Руским Керестуре и на Рукометним кампу у Оджаку, читаче вецей дознаю у рубрикох „Фото-памятки”, „Висти зоз школох” и „Здрави дух”.
Литературна часц „Заградки” почина з привитну писню за школярох перших класох, а ту и кратки приповедки Михайла Ковача, Мирона Будинския и Миколу Скубана, та писнї Василя Мудрого, Ирини Гарди Ковачевич и Серафини Макаї.
У „Малей заградки” у тим школским року цали єден бок буду крашиц малюнки предшколских дзецох.
Найкрасши литературни роботи з наградного конкурсу „Смотри славянскей писменосци” у Тителю виполнєли аж три боки новей „Заградки”, а обявени и мена школярох котри достали награди за литературни и подобово роботи обявени у часопису у прешлим школским року, як и хтори оддзелєня преглашени за найвреднєйших сотруднїкох „Заградки”.