Вчера на Мемориялє бул дзень Кулянцох

автор сен
1.2k Опатрене

РУСКИ КЕРЕСТУР – Вчера на Драмским мемориялє бул дзень Кулянцох, понеже после рускей дзецинскей представи з Кули, ґлумци з Културного центру Кула вечар виведли познату комедию Бранислава Нушича „Подозрива особа”, алє тераз з модернима елементами, по видзеню режисера, професийного ґлумца з Кикинди  Драґана Остоїча.

Гоч текст спада до класики сербскей драми, режисер и ґлумци указали же дружтвена тема корупциї и нєспособней власци вше актуална и вична и Кулянци на ориґинални способ вишмеяли державни апарат, нєспособносц, нєфаховосц и нєписменосц службенїкох, котри вирни власци лєм пре власни хасен.

Ґлумцом у представи було виволанє бешедовац зоз специфичним диялектом централней и южней Сербиї, гварел директор Културного центру Каменко Бертич, котри у представи ґлуми „Єротия”. Гоч текст з часци прилагодзени сучасносци, зачувана його ориґиналносц, а зоз сучаснима костимами добре указане (и спозорене) на прави и тирваци менталитет чловека зоз Сербиї.

Попри Бертича у представи ґлумя Ґордана Мештер, Тамара Плавшич, Зоран Радулович, Секуле Андєлич, Слободан Ноґавица, Боян Алексич, Бранислав Унґинович и Страхиня Щекич, а награду публики за найлєпше одбавену улогу достал Зоран Радулович за улогу „Витї”.

ПОВЯЗАНИ ТЕКСТИ