НОВИ САД – Явна медийска установа Радио-телевизия Войводини вчера означела свой дзень, як здогадованє на 29. новембер 1949. року кед основани Радио Нови Сад, а потим и ТВ Нови Сад, хтора з роботу почала 26. новембра 1975. року.
З нагоди Дня РТВ ґенерални директор тей медийней хижи др Миодраґ Копривица визначел же Влада Сербиї и Покраїнска влада, вєдно з Городом Нови Сад, ришели збудовац нови будинок РТВ на месце старого, зруйнованого 1999. року и о тидзень будзе розписани перши тендер за валянє старого будинку и чисценє простору, а пошвидко будзе вибрани и будователь нового обєкту на Мишелуку.
Од самого початку ТВ Нови Сад емитовала програму на пейцох язикох – сербским, мадярским, румунским, словацким и руским, нєшка емитує програму на седем платформох и 13 язикох, а уж 10 роки роби и веб-сайт РТВ, тиж на вецей язикох.
З нагоди Дня РТВ Рочне припознанє достали вецей дзешатки роботнїки РТВ, а припознанє „Славуй Хаджич” достала Светлана Милянич з Документарно-образовней програми.
