НОВЕ ОРАХОВО – После нащиви Подручней канцелариї у Суботици, исти дзень, 29. юния, предсидатель Вивершного одбору Желько Ковач и секретар НС Руснацох Таня Арва Планчак нащивели и Подручну канцеларию НС (ПК НС) у Новим Орахове, односно КУД „Петро Кузмяк”.
Як гварели домашнї, на чолє з координаторку ПК НС Татяну Дудаш, проблеми у роботи подобни як и у Суботици, а насампредз то нєдостаток активних членох и младих, цо ше одражує на роботу шицких секцийох, алє и на очежану роботу особох котри волонтерски водза Дружтво.
О стану у култури бешедовали Владимир Маґоч и Михайло Еделински, предсидатель КУД, котри наглашели потребу за фаховцами у роботи з аматерами у музично-фолклорних секцийох, за цо би нашо институциї мали видвоїц средства. Як гварели, членство секцийох вше вецей мишане, у нїх вше менєй Руснацох, а на єшень планую порушац роботу танєчних секцийох за младши, школски возрости. Ораховчанє поряднє участвую на шицких наших найзначнєйших фестивалох, як и на локалних и манифестацийох у других местох, гварене на схадзки.
О образованю бешедовала учителька Сенка Бенчик, котра визначела потребу зазберованя потребного числа школярох з Орахове и Бачкей Тополї же би ше могло направиц ґрупу за отримованє настави по руски у нїзших и висших класох ОШ, цо ше дотераз нє удало. Наглашела же дзеци мотивовани кед ше путує, наступа, а проблем и же у спомнутих местох нє постої виучованя руского язика на предшколским уровню.
Маґоч и Еделински бешедовали и о проблемох зоз стару технїчну опрему у КУД, так же им и то проблем у посиланю информацийох до наших медийох, а ище векши же ше их нє так часто обявює, кед су уж послати.
И у Суботици и у Орахове заключене же таки стретнуца з представителями НС барз добри и потребни, бо ше нєпоштредно бешедує о постояцих проблемох, а представителє НС наглашели же Совит вше порихтани помогнуц канцеларийом, односно нашим КУД у ришованю проблемох.
И Подручней канцелари НС у Орахове Желько Ковач придал малюнок Владу Нярадия з циклусу „Карпатски мит”, як його дарунок каждому КУД
