КУЛА – Вирни грекокатолїцкей парохиї св. Йосафата у Кули швето Рождества Христового почали преславйовац з першу крачунску Службу Божу у вилїйовей ноци, а пред тим, на 23 годзин и зоз Всеночним, хтори служели парох о. Виталий Лотоцки и капелан о. Платон Салак, монахи Василиянє.
Вчера, на перши дзень велького швета, Служби Божо були на 9 и на 17 г., и на обидвох читана Крачунска винчованка нашого владики Георгия, по руски и по українски. Владикова винчованка пречитана и на Служби у Крущичу, на 9 годзин.
По раншей Служби у кулскей церкви традицийни Крачунски концерт отримали члени КУД „Иван Сенюк”, на хторим виведзени коляди и крачунски винчованки.
Нєшка, на Други дзень Крачуна и Собор Богородици, та на раншей и вечаршей Служби будзе мированє. Служби буду и на ютре, на Треци дзень Крачуна, кед Церкв пресвалює першого мученїка Штефана.
