НОВЕ ОРАХОВО – Шлїдуюцого викенду, 27. и 28. авґуста у Новим Орахове будзе отримана 15. Културна манифестация „Днї нового хлєба”.
Першого дня, на соботу, буду орґанизовани спортски змаганя у малим фодбалу и кошарки и Бависка без гранїцох за хтори вше вельке интересованє нє лєм Ораховчаньох, алє и людзох з околних местох. После змаганьох будзе диско на отвореним.
Другого дня, на нєдзелю пред поладньом, будзе змаганє у вареню паприґашу. У вчасних пополадньових годзинох у голу Дома култури будзе отворена вистава ручних роботох, опрез будинка будзе и вашар ручних роботох, а на три годзин будзе Служба Божа на котрей ше пошвеци нови хлєб. У Руским доме писатель Часар Левенте представи нову кнїжку, по улїцох ше прейду фиякеристи, а на пейц пополадню дзешец културно-уметнїцки дружтва отримаю културну програму. На вечар будзе концерт на котрим буду шпивац Жарко Прибакович и Атила Кекинь зоз Бачкей Тополї, односно „Асове” зоз Трешнєвцу.
Хто ше сце приявиц на спортски бависка и Бависка без гранїцох, вецей информациї може достац на телефон 064/337 9963. Орґанизатор Манифестациї „Днї нового хлєба” Месна заєднїца Нове Орахово, односно нєвладово орґанизациї, културно-уметнїцки и спортски дружтва.