НОВИ САД – Подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш вчера у Покраїнскей влади отримал схадзку з представителями националних совитох (НС-ох) националних меншинох задлужених за образованє, а на инициятиву Координациї НС-ох. На схадзки присуствовали представителє мадярского, словацкого, румунского, руского, горватского, бунєвского и ческого националного совиту, як и державна секретарка у Министерстве просвити, науки и технолоґийного розвою Анамария Вичек. Спред НС Руснацох на схадзки присуствовала предсидателька Одбору за образованє Мелания Римар.
Бешедоване о витворйованю настави мацеринского язика з елементами националней култури як виборного предмету у основних и штреднїх школох, а Нїлаш визначел значносц мацеринского язика у розвою особи и єй идентитету, як и же Покраїнски секретарият хторому є на чолє уж розпатрал проблеми у витворйованю настави мацеринского язика з елементами националней култури, аж иницировал и вименки и дополнєня Правилнїку о наставним планє за основни и штреднї школи.
Анамария Вичек з тей нагоди гварела же у планє реформа просвити и Закона о основох системи образованя, дзе важну улогу будзе мац и спомнути предмет, а представителє НС-ох винєсли свойо замеркованя з пракси, дзе як єдну з почежкосцох визначели же у дзепоєдних школох ище вше єст проблеми з коректним анкетованьом школярох, односно їх родичох о вияшньованю за виучованє мацеринского язика.
Найвекши проблем формованє ґрупох пре менше число школярох (та з тим и ґрупох), а як гварели, почежкосц у настави мацеринского язика як виборного предмету представя и нєєднаки уровень знаня школярох свойого мацеринского язика, док наставна програма конципована по класичней шеми, без предвидзених диференцованих змистох.
На концу схадзки предложене же би ше направело предлог з напрямками за злєпшованє настави мацеринского язика з елементами националней култури. Тиж так, потребне конкретно дефиновац минималне и максималне число школярох у єдней ґрупи, як и максимални розпон возросту школярох у єдней ґрупи, та запровадзиц же би годзини були у урядовим розпорядку наставних годзинох школи.
Заключене и же би требало потримац предкладанє НС-ох же би їх одбори за образованє, у сотруднїцтве з видавателями, обезпечовали компетентних авторох, прекладательох, лекторох и рецензентох котри у оптималним чаше годни пририхтац учебнїки и додатну литературу, та други наставни средства, пре цо лєпше витворенє настави мацеринского язика як виборного предмету.
