ҐОРЛИЦИ (ПОЛЬСКА) – У Ґорлицох, у Польскей, нєшка, 5. децембра, будзе означени Дзень Русинох на Лемковини, у орґанизациї Здруженя Руска бурса (берза).
З тей нагоди у Ґорлицох будзе одкрита памятна табла на чесц Александрови Духновичови, а бешеду з назву „Рецепция Александра Духновича на Лемковини” отрима др Олена Дуц-Файфер.
Дзень Русинох Лемковини, хтори ше, як визначую орґанизаторе, отримує у рочнїци преглашеня Рускей Народней Републики Лемкох у Флоринки 5. децембра 1918. року, будзе означени и з концертом двох ансамблох з Чинадиєва коло Мукачова у Закарпатскей (Подкарпатскей) обласци України – „Бабова шпиваночка” и „Червена ружа”, та домашнього ансамблу Рускей бурси – „Терочка”.
Попри у Польскей, Дзень Русинох на Лемковини будзе означени и у Словацкей, у Прешове, дзе на гроб Александра Духновича у церкви св. Йоана Крестителя будзе положене квеце.