КОЦУР – Вчера на Пелетовим салашу у Коцуре отримане друженє и розвага за дзеци з окремнима потребами, з ґрупи дзецох „Нашо ангели” з Коцура и їх госцох зоз Здруженя „Облапенє” з Кулпину.
Як Рутенпрес дознаваме од волонтерки котра роби з коцурскима дзецми Марґарети Фаркаш, стретнуца з Кулпинчанами поряднє отримую, бо жадаю же би ше дзеци цо вецей дружели, а то и нагода же би даґдзе одпутовали, пошли на вилєт и видзели дацо нове.
Дзеци на тим друженю вєдно рисовали, бавели дружтвени бависка, а за нїх бул орґанизовани и заєднїцки полудзенок. Попри Фаркашовей, дзеци анимировали и Мария Буила и Сладяна Крнетич, як и родичи дзецох з Кулпину.
Вчерайше друженє потримала Месна заєднїца Коцур и други спонзоре.