РУСКИ КЕРЕСТУР – Тогорочни, пияти Днї керестурскей паприґи, буду 13. и 14. авґуста, заключене на преширеней схадзки Орґанизацийного одбору, хтора внєдзелю, 12. юния отримана у керестурскей Месней заєднїци.
Днї керестурскей паприґи того року буду отримани на трох локацийох – 13. авґуста (собота) дополадня за паприґарох на оглядним полю под рогову паприґу файти „каптур”. Пополадню зоз сотруднїками Здруженя паприґарох, насампредз одкупйовачами, тиж будзе орґанизована нащива польом под паприґу, а потим у центре валалу дефиле парадних кочох, отверанє манифестциї, маскенбала дзецох, културно-уметнїцка програма и розвага за нащивительох.
У центре буду и рижни штанди з ручнима виробками, желєняву, штанди осиґуруюцих и хемийских хижох з хторима паприґаре сотрудзую, як и варенє єдлох у вецей котлох.
Як то уж узвичаєне, манифестация други дзень (на нєдзелю, 14. авґуста) будзе на Гиподроме „Леї”, дзе буду конїцки обегованя, штанди, варенє єдлох у котлох, а того року и рижни змагательни бависка за дзеци.
Главни орґанизаторе Дньох керестурскей паприґи Здруженє паприґарох, у блїским сотруднїцтве зоз Здруженьом женох „Байка”, Здруженьом ремеселнїкох и приватних поднїмательох, Конїцким клубом „Русин”, Месну заєднїцу, ЯКП „Руском”, Домом култури, та здруженями рибарох и ловарох.
За орґанизованє манифестациї конкуроване до Покраїнского секретарияту за польопривреду, потримаю ю и велї спонзоре, а орґанизатором наявене же того року главни покровитель Дньох керестурскей паприґи будзе Општина Кула.
Того пиятку, 17. юния, Здруженє паприґарох за прейґ 30 своїх сотруднїкох з рижних хемийних, осиґуруюцих хижох и фахових польопривредних службох, котри вжиме заградкаром тримали преподаваня, на Лонґове орґанизує друженє и вечеру, а шицки вони и спонзоре Дньох паприґи.
