МУКАЧОВ/ПЕТРОВЦИ – Дружтво Руснацох у Републики Горватскей „Руснак” з Петровцох прешелей соботи, 19. новембра, участвовало на Медзинародним фестивалє русинскей култури „Червена ружа трояка” у Мукачове, у України.
Спред Дружтва „Руснак” на Фестивалє наступела Дзивоцка шпивацка ґрупа з рускима народнима шпиванками, з провадзеньом оркестру, а попри домашнїх, участвовали и музично-танєчни ансамбли зоз Словацкей и Румуниї.
У рамикох Фестивалу отримана и Медзинародна наукова конференция з тему „Русини у Европи и у України”, на хторей з Горватскей участвовала учителька руского язика Наталия Гнатко, а учашнїки на Фестивалє положели и квеце на памятнїк Александрови Духновичове у Мукачове.
Одход на Фестивал до Мукачова у Закарпатскей обласци України членом Дружтва Руснацох з Петровцох оможлївела Рада рускей националней меншини Городу Вуковар.
Медзинародни фестивал русинскей култури „Червена ружа трояка” орґанизовали Крайове здруженє подкарпатских Русинох з Мукачова и Здруженє русинских орґанизацийох Подкарпатя у України „Русинска нация”.