НОВИ САД – Всоботу, 30. юлия, отримани квиз знаня з руского язика и култури, як остатня активносц у Тижню руского язика и култури хтори отримани у рамикох Манифестациї „Под корунами на Штранду”.
Перше место освоєла Надя Колесар (5 роки), друге место Катарина Сабо (9 роки), а треце место освоєла Ирина Зимонїч (12 роки). У жирию були Блажена Хома Цветкович, Мелания Римар и Ана Римар.
У квизу могли участвовац дзеци котри найменєй три раз були на роботньох хтори ше отримовало од пондзелку, 25. юлия, по пияток, 29. юлий. Роботнї були наменєни дзецом од 5 до 12 роки котри нє знаю по руски. За тоти пейц годзини дзеци научели коло 50 слова по руски, як цо то фарби, числа, овоц, животинї, а за учашнїкох то була и окремна нагода же би постали свидоми же коло нїх єст людзох котри бешедую иншак як вони. Тиж так, могли чуц и дацо вецей о Руснацох.
Пред роботнями з руского, на спомнутей манифестациї отримани роботнї з мадярского язика, а того тижня почали роботнї зоз словенского язика. По конєц манифестациї буду ище роботнї зоз словацкого и румунского язика, а вецей информациї о тим мож найсц на Фейсбук боку „ Pod krošnjama na Štrandu”.
