БЕОҐРАД – Вчера у Палати Сербия у Беоґрадзе отримана схадзка представительох Канцелариї за людски и меншински права Влади Републики Сербиї и националних совитох националних меншинох о розподзельованю средствох з державного буджету за 2015. рок.
Директорка Канцелариї Сузана Паунович визначела же буджет того року за 5 милиони динари векши як прешлого, алє понеже основани нови – Национални совит чарногорскей националней меншини, хтори за початок роботи достал дакус вецей як 7 милиони динари – з тим вкупни буджет за национални совити менши за 2 милиони динари.
Национални совит Руснацох з буджету Сербиї у 2015. року достанє 9 милиони 339 131 динари, односно 630 872 динари вецей як прешлого року. По податкох Канцелариї за людски и меншински права, дакус вецей средства достали и национални совити бошняцкей, бунєвацкей, мадярскей, македонскей, словацкей и словенацкей националней меншини, док други совити достали менєй средства.
Векшина националних совитох нєзадовольна и апелує на державну управу же би ше средства за їх роботу звекшало, без огляду на економску кризу, а знова порушани и теми снованя окремного фонду за национални меншини и потреби креированя системскей меншинскей политики.
Даєдни представителє националних совитох мали зауваги на розлични третман меншинох з Войводини и централней Сербиї, з оглядом же национални совити зоз шедзиском у Войводини доставаю средства и з державного и покраїнского буджету.
Национални совит Руснацох на вчерайшей схадзки представял заменїк предсидателя Совиту Йовґен Мудри.
