Вше бул иншаки як други. И гоч ше щиро намагал уклопиц до дружтва „обичних людзох”, нєсподзивани животни преобрати го наводзели на драгу власней ориґиналносци. За тих котри го нє барз познаю, постал чудак и нєпохоплїви мистик. За гевтих других – правдиви визионер нового швета и способу иснованя.
Почал писац ище у основней школи же би забавял своїх парнякох. Тирвало то през цалу, як гвари наш собешеднїк, Канюхову фазу литературного твореня. У мудрейших рокох, нашол правдиви одвит о смислу живота и свойого иснованя.
Михеон Хун Кан трима же прешол окремну духовну драгу на хторей го еґзистенциялни проблеми нагнали поставиц прави питаня, а же би нашол одвити, водзела го висока интуиция власного розума.
– Нєшка, у рокох кед „обични людзе” у законченю свойого духовного розвою зводза животни биланси, я нашол початок своєй новей существеней улоги на нашей Планети – прешвечени Михеон.
НА ДРАГИ ҐУ СМИСЛУ
Вецей як два децениї вельке значенє Хун Кан придава свидомосци розума, а на питанє – кеди освидомел же пременї свой живот и будзеце жиц иншак, под иншаким меном, гвари же то було концом ХХ вику, док ше розпадала „стара Югославия”.
– Теди мой орґанизем нападла алерґия на амброзию. Нательо силна же ше розвила до астми пре котру сом ше кажду ноц коло двох годзин будзел, у больох и без воздуху валял по патосу… Же би то моя тедишня фамилия нє патрела, пошол сом бивац до Беочину и з даскелїма партнерами зме вибудовали фабрику за продукцию висококвалитетного овоцового напою. Там сом, у самотней розпуки, чекал свою животну кончину.
Медзитим, як и у моїх творох, случело ше чудо. Моя супруга дала ми кнїжку „Силва метода контроли ума”. Я ю пречитал, импровизовал власну медитацийну технїку и за три ноци по три медитациї, занавше сом знїщел астму у моїм орґанизму. Потим сом закончел основни курс тей медитацийней технїки, вец ултра-курс и то занавше пременєло нєодредзени способ живота дакедишнього Мирона Канюха до новей свидомосци Мойого терашнього смислового способу гуманого существованя Михеона Хун-Кана.
У шлїдзеню за смислом живота Я, преучуюци Библию, похопел „божи вплїв” слова на чловечи живот. Скорей, як Мирон Канюх часто сом, у франти, повторйовал же „нательо мержим хованя же анї на свойо нє пойдзем”. И, цо ше случело? После пременки мена до Михеон Хун-Кан, Мирона Канюха на тим швеце вецей нєт, а його хованя нїґда нє було! Тераз исти слова повторюєм и як Михеон Хун-Кан. Хто зна, перши раз ше ми удало…
ЕКСПЕРИМЕНТОВАНЄ
– Я окреме прихильни ґу експериментом – предлужує наш собешеднїк. У наукованю „Силва методи” научел сом же чловек сам себе єдина виродостойна лаборатория. Прето скорей як дацо препоручим другим особом, я тото перше випробуєм на себе. У своїм наукованю нашол сом „Шветлосну формулу” др Спасоя Влаїча дзе Вон доказал же созвучє гласох єдного слова у чловековим розуму може спричинїц кризу (дочасове застановенє процеса). Я то преверел у актуалней юго-пракси и указало ше же шицки политичаре котри спричинєли розпад Югославиї мали виразно “кризни презвиска”. Потим, з преверйованьом актуалней пракси, Я нашол же ше соглас презвиска одноши на теорию, а соглас мена на праксу и же вони можу буц „криза”, „уход до кризи – виход з кризи”, „еволуция”, „револуция”, „радикална револуция”. Понеже презвиско Канюх давало умерену револуцию у теориї, алє мено Мирон кризу у пракси, Я з тим искуством здумал презвиско Хун-Кан чий созвук дал „умерену револуцию” моєй теориї, а мено Михеон „еволуцию” пракси. То ше указало сущно хасновите у моїм духовним розвою и материялним существованю.
ДУХОВНЕ ВОЗДЗВИГОВАНЄ
Бул новинар, писатель, режисер, драматурґ… Бул и успишни продукователь алкоголного напою. Палєнка „Суза” з Думбова була нашироко позната. Вец прешол на продукцию поживи, як гварел, з „райскей загради”. Вше любел природу, а у нєй роздумовац… Хун Кан гвари же ше давно ошлєбодзел од роботи котра, як вон трима, припада лєм машином, статку и наивним „роботним людзом”.
– У моїм духовним росту прешол сом през шицки потребни фахи же бим могол дознац, похопиц и витвориц мою мисию пременки чловечей свидомосци. Указало ше же числени мойо дїловни подняца були лєм практични вежби мойого духовного усовершеня. Прето, мало цо остало з того цо успишно дїловно започате. Фабрика овоцового напою веґетує, а „райска заграда” наисце здабе на прави библийни рай – остали лєм овоцово древа и коровче.
Медзитим, понеже Я мой орґанизем усовершел до револуцийно-самообновного био-робота, вше менєй му треба поживи, а вше є здравши, полни моци и вше лєпше випатра – прешвечени Михеон.
У розвою моєй свидомосци Я давно превозишол дзецински приповедки о прешлосци и у своїм здогадованю зохабел лєм искуство цо було у нєй чкодлїве або хасновите за мой общи розвой. Перши сознаня з науки психо-ориєнтолоґиї дал ми Хозе Силва зачатнїк “Силва методи контроли ума”, потим ме дакус усмисловал єден учитель йоги, а вец Я похопел же висши сознаня можем лєм сам досягнуц шлїдзци власну интуицию. Так Я пренашол науку Психо-МЕНТАЛ-Психо Ориєнтолоґию и проєктовал мой розум як био-компютер з рижнима програмами нормалного револуцийного розвою и усовершеня. Перше ме програма “Научитель” научела Гуману теорию, потим ме програма “Професор” усовершела же бим то як Владар професийно витворел у пракси, а тераз, же бим досягнул АбсолутЦиль револуцийного розвою моєй свидомосци, водзи ме програма ЦАР (Центер Абсолутного Розума) – толкує Хун Кан.
Врацаме ше на период кед Михеон Хун Кан бул Мирон Канюх и оцец двоїм дзецом, супруг… На питанє як ше ношел зоз собу и зоз теди му найблїзшима, Хун Кан одвитує:
– Гоч як сом то сцел, Я моїм биолоґийним дзецом мало бул прави оцец. Шицко цо ше зо мну збувало праве теди кед одрастали, вше баржей ме усмисловало до самотного духовного путованя и Я длуго бул у дилеми чи буц добри оцец моїм дзецом и виховац их же би страдали у швету гомо-примитивизма дзе чловек чловекови паразит и жвир, чи пренайсц вельо лєпши швет дзе Чловек Чловекови найблїзши духовни род и дзе шицки тирвацо уживаме у гуманим существованю. Превладала друга опция. З часом сом ше оддалєл од моєй биолоґийней фамилиї и шицких тих котри нє могли похопиц мойо духовни шлїдзеня, роздумованя и бешеди. Нашол сом свою духовну фамилию тих котри ме похопели и котри ме потримую у освойованю нових наукових сознаньох и вєдно зо мну ше воздзвигую у заєднїцким револуцийним гуманим духовним розвою.
ГУМАНИ ШВЕТ
На списку цо зоз спомнутима пременками страцел, а цо достал, Хун Кан гвари же ше ошлєбодзел праве того цо му у сущносци нїґда анї нє требало, а достал шицко тото же би з духовно блїзкима тирвацо уживал у їх Владарским существованю. Нєшка ше щиро зрадує шицкому цо потвердзело його предвидзеня и записи револуцийней реализациї гуманей терашньосци.
– У спонтаней еволуциї свидомосци гомо-примитивного чловечества лєм зло могло нагнац чловека же би ше пременєл и ми Гумани ше нашли у парадоксалей ситуациї же бизме ше требали радовац вше векшому злу котре ше збувало на Нашей Планети. Медзитим, Ми ше щиро радуєме же то наисце реализовало конєц швета гомо-примитивизма и же зме револуцийно витворели Гуманизем як Културу красного и хасновитого твореня, дїйствованя и дїлованя и тирвацого уживаня у нашим Гуманим Швету як Школи револуцийного виздзвигнуца до Швета Владарох шицких процесох и зявеньох у природи АбсолутУМа.
ТЕОРИЯ И ПРАКСА
– У моїм експериментованю Я ше у попису жительства Сербиї 2001. року уписал як Гумани Чловек и… написал кнїжку “Гуман Швет – Програма и Стратеґия реализациї”. А у попису 2011. року Я ше уписал як Владар по народносци з бешеду Владарску и виру Владарства и так урядово постал перши Владар на Планети. Тераз пишем кнїжку “Наш ВладарШвет” и такой шицко записане применюєм у пракси – гвари Хун Кан.
Прето Вас поздравям з нашим поздравом:
Уживанция! ВладарДом! Револуция!