КУЛА – Вчера вечар у Ґалериї Културного центру у Кули отворена самостойна вистава малюнкох и рисункох Амалиї Ковач з Кули, з назву „Имаґинациї и памятки”, а як на отвераню визначел секретар Културно-просвитней заєднїци Кула Сава Прерадович, з тоту виставу Амалия означує и 40 роки нєпреривней и успишней роботи у аматеризме, у вецей обласцох.
Виставу творя два, як гварел Прерадович – розлични, алє складни цалосци, понеже виложени реални и апстрактни малюнки и рисунки Ковачовей, у складзе з єй инспирациями, чувствами и роздумованями.
Вистава лєм цалосц широкей палети активносцох и творчосци Ковачовей, гварел Прерадович на отвераню, а кулска и ширша явносц ю найбаржей позна як позарядового фаховца у рецитованю, у чим єй рецитаторе посцигли позарядово успихи, з якима ше ридко хто у Сербиї може похвалїц.
– Ковачова, котрей мацерински язик руски, вершински фаховец за сербски язик! Єй уровень и критериюм републични верх рецитованя – гварел Сава Прерадович
Рутенпрес додава же за коло 30 роки роботи як педаґоґ рецитаторох, єй рецитаторе на Републичней смотри освоєли два перши, два други и два треци места.
Як илустрация роботи Амалиї Ковачовей у рецитованю бул и наступ єй унуки Лїляни Кнежевич, котру тиж пририхтовала за змаганя, з писню Неделька Попадича „Даєдни це нє любя людзе”, з хтору того року участвовала на Републичней смотри у Валєве. Лїляна Кнежевич на отвераню вистави на гармоники и одграла композицию „Мала свита” Ракова, з хтору освоєла першу награду на Медзинародним змаганю „Млади виртуози”.
Амалия Ковач ше з мальованьом и рисованьом активнєйше почала занїмац пред коло 10 роками, перша самостойна вистава єй орґанизована под час тогорочней Централней шветочносци означованя националного швета Руснацох у Кули, а тота друга самостойна у Ґалериї Културного центру Кула тирва 10 днї.