КОЦУР – Внєдзелю на стадиону ФК Искра одбавене стретнуце у Подручней лиґи Суботица помедзи домашню екипу и АФК (Ада), а закончене є з резултатом 1:1 (0:0).
Фодбалером Искри би побида процив екипи АФК у велькей мири помогла у виполнєню циля, а то оставанє у Подручней лиґи Суботица. Свидоми того, вони од початку бавели аґресивно, борели ше за кажду лабду и були лєпша екипа на терену, алє после першого полчасу резултат остал нєришени.
У другим полчаше обидва екипи предлужели бавиц у истим ритме. Шанси було на обидвох бокох, а до предносци перши дошли домашнї фодбалере. После даскелїх препущених шансох ушлїдзела кара кед центарфор госцох добре виведол шлєбодне бице и поровнал резултат. После приятого ґола госци превжали бависко и по конєц могли и подполно обрациц резултат, алє ґолман Искри одбранєл даскельо барз добри шанси и зачувал свой ґол.
Ґол за Искру дал Бокан, а бавели: Ступар, Ваяґич Л., Сталевич, Дякович, Пердух (Ваяґич Д.), Човс (Барович), Стоянович, Колошняи (Дакич), Дюрич, Иван и Бокан.
По конєц першенства остало одбавиц ище єдно коло у котрим Искра будзе госцовац у Бачким Добрим Полю, а процив Сутєски будзе бавиц за 11. место на таблїчки, котра сиґурно обезпечує оставанє у лиґи. После того кола Искра зоз 33 бодами на 12. месце на таблїчки. Пре реорґанизацию лиґи ше ище нє зна кельо екипи випадню з лиґи.