РУСКИ КЕРЕСТУР – Вчера, 9. мая, на Дзень побиди над фашизмом у Другей шветовей войни на памятнїк погинутим борцом Народноошлєбодительней войни (НОВ) у центре Руского Керестура положени венєц у мено шицких Керестурцох, а того року на тей подїї присуствовало красне число людзох, найвецей младих.
Праве двоме млади Керестурци – Янко Хома и Себастиян Няради, прейґ дружтвених мрежох поволовали младих, и вообще Керестурцох, же би присуствовали тому збуваню и достоїнстрвено означели Дзень побиди.
Инициятиву младих потримала и Месна заєднїца, у чийо мено на приходзе на тото збуванє присутним подзековал предсидатель Совиту Владимир Олеяр, визначуюци же ше дава почесц людзом котри дали свой живот же би будуци ґенерациї,та и терашнї, жили у мире.
Присутним подзековал и спомнути Янко Хома, котри визначел же нєшкайши дзень наисце вельки датум, хтори треба пестовац, як и гордосц же ше и Керестурци у Другей шветовей войни борели на боку союзнїкох.
З Руского Керестура у НОВ участвовали прейґ 350 особи, спомедзи котрих 56-еро погинули.
После кладзеня венцу на памятнїк, шицким погинутим борцом почесц дата и з минуту цихосци.