РУСКИ КЕРЕСТУР – Вчера вечар у Руским Керестуре, у Майсторским доме отримана рочна Скупштина керестурского Здруженя паприґарох „Капсикум анум”, на хторей оценєте же у прешлим року Здруженє добре робело и витворело шицки свойо плани.
Як визначел його прдсидатель Владимир Варґа, Здруженє у витворйованю програмних цильох нє потрошело свойо пенєжи, алє их находзели з других жридлох, док свой пенєж чуваю за дзепоєдни векши инвестициї.
– На половки зме свойого мандату як руководство Здруженя и за два роки думаме обезпечиц ище даяку опрему за роботу и отримац финансийну стабилносц, же би нове руководство могло предлужиц робиц – гварел Варґа.
У тим року Здруженє планує прешириц нащиви пре фахове едукованє своїх членох, и далєй робиц на промоциї керестурскей паприґи, у чим найважнєйши Днї керестурскей паприґи, а того року буду отримани 15. авґуста.
Як констатоване, число членох Здруженя ше з рока на рок звекшиє, и на початку 2015. ма коло 70 членох.
На схадзки Скупштини присуствовали и представителє других керестурских здруженьох, Месней заєднїци и дзепоєдних подприємствох, як и директоре филиялох ОТП банки у Кули, Вербасу и Оджаку, котри паприґаром бешедовали о вигодних кредитох за польопривреду тей банки.
