БЕОҐРАД – На 61. Медзинародним сайме кнїжкох у Беоґрадзе свойо найновши виданя представи и НВУ „Руске слово”, а презентация виданьох „Руского” будзе на штварток, 27. октобра на 11 годзин у сали „Борислав Пекич” Беоґрадского сайму.
Попри тим, кнїжки по руски, як и других националних меншинох з Войводини, кажди дзень годно видзиц на штанду Покраїнского секретарияту за образованє, предписаня, управу и национални меншини-национални заєднїци АП Войводини, дзе буду виложени.
Дотераз сиґурне же на штанду буду виложени, та и представени, шлїдуюци нови кнїжки НВУ „Руске слово” – „На крижней драги” Янка Рамача, „Гайзибан на шпарґу” Меланиї Римар, „Злагода” Серафини Макаї, „Мадярска Горнїца” Мирона Жироша, „Безсони ланцущок” Славици Шовш, „Капка ми ружа до ока” Звонимира Нярадия и „Шантовки” Миколу Шанти.
У Видавательстве „Руского” обчекую же по 27. октобер (по представянє на Сайме) виду и кїжки „Славянски язик” Любомира Белея, „Сучасна українска драма” Людмили Попович и Надїї Мирошниченко и кнїжка за дзеци Ирини Гарди Ковачевич „Котульки и ґомбульки”.