БЕОҐРАД – На вчерайшим округлим столє о „Ключних виволаньох националних совитох националних меншинох у Сербиї од 2015. по 2020. рок”, хтори у Беоґрадзе орґанизовал Проєкт „Меншински висти”, визначене же кед ше принєшени закони нє запровадзує, односно нєт нїяки санкциї за їх нєзапровадзованє, вец вони лєм декларациї – дознава Рутенпрес од заменїка предсидателя Националного совиту (НС) Руснацох Йовґена Мудрия, котри у мено Совиту присуствовал на тим сходзе.
О пременкох и дополнєньох Закона о националних совитох бешедовал заменїк Координациї националних совитох у Сербиї Есад Джуджо, заложел ше за цо лєпши будуци закон, применлїви од верховней по локалну власц, а за помоц у його вирабяню поволал и цивилни сектор. Джуджо бешедовал и о отвераню поглавйох 23 и 24 у процесу предприступних прегваркох з ЕУ, а наглашел и же потребне дефиновац статус националних совитох меншинох бо су, як гварел, тераз дефиновани як „нєдержавни цела меншинских управох”.
Свойо думанє о терашнїм Законє о националних совитох у контексту оценьованя дзепоєдних його членох як нєуставних винєсол и народни посланїк Риза Халими, та є думаня же попри приношеня нового Закону, потребне принєсц и нови Устав Републики Сербиї.
О искуствох и на прикладзе роботи Националного совиту Румунох, насампредз у поглядзе його деполитизованя, на округлим столє бешедовал Марчел Драґан, закладаюци ше за цо менши уплїв политики у националних совитох, односно же би вони були значнєйши як системи културней автономиї.
Попри представительох националних совитох меншинох у Сербиї, на вчерайшим округлим столє присуствовали и представителє Министерства за державну управу и локалну самоуправу и Канцелариї за людски и меншински права Влади Републики Сербиї.