НОВИ САД – Универзитет у Новим Садзе обявел два явни конкурси – за предкладанє кандидатох за рочни награди – „Др Зоран Дїндїч за младого науковца и виглєдовача“ и „Др Зоран Дїндїч за найлєпшу дипломску роботу, закончуюцу роботу на мастер академских студийох, лєбо маґистерску роботу з филозофских и социолоґийних наукох“.
На конкурс за „Др Зоран Дїндїч за младого науковца и виглєдовача“ ше можу приявиц кандидати котри у роботним одношеню у наукових институцийох у АП Войводини, а маю до 35 роки. Наградзени науковец достанє диплому и пенєжну награду.
Рочну награду „Др Зоран Дїндїч за найлєпшу дипломску роботу, закончуюцу роботу на мастер академских студийох, лєбо маґистерску роботу з филозофских и социолоґийних наукох“ може достац студент котри дипломску, мастер, лєбо маґистерску роботу одбранєл того року. Автор найлєпшей роботи тиж достанє диплому и пенєжну награду.
Приявиц ше мож по 30. новембер, а вецей информациї о конкурсу мож опатриц на сайту Универзитету у Новим Садзе – www.uns.ac.rs