БЕОҐРАД – Директор Заводу за културу войводянских Руснацох мр Серґей Тамаш и директорка Етноґрафского музею у Беоґрадзе др Миряна Менкович 7. мая подписали Контракт о фахово-програмним сотруднїцтве за промоцию и презентацию Руснацох и рускей националней заєднїци у Етноґрафским музею у Бероґрадзе.
По Контракту предвидзене же вистава „Национални костим Руснацох у циклусу животних обичайох” будзе отримана од 14. по 30. авґуст у Фордовей сали у Етноґрафским музею у Беоґрадзе. Отверанє вистави плановане 14. авґуста на 13 годзин, а вистава будзе мац коло 35 панои, на хторих буду приказани фотоґрафиї з колекциї грекокатолїцкей парохиї у Руским Керестуре и вельке число експонатох з текстилу и провадзаца опрема.
У програмней часци през пейц днї буду пейц розлични тематски презентациї Руснацох и рускей култури. После отвераня, други тематски вечар (17., лєбо 18. авґуста) будзе пошвецени науки и науковим досягу, треци (23. авґуста) литератури, а штварти (26. авґуста) промоциї моноґрафиї „Народне облєчиво бачванско-сримских Руснацох”, дзе ше и „на живо” прикаже облєканє и чесанє и Етно-стол. Пияти вечар (29. авґуста) заплановани за промоцию танцох и фолклору – шветочни закончуюци концерт и заверанє вистави.
Контракт облапя и будуце струднїцство медзи Заводом и Етноґрафским музейом, як цо то заєднїцке приявйованє на конкурси державних институцийох з обласци култури и науки, черанку информацийох и заєднїцке участвованє у реализациї проєктох интернационалного значеня, кажде у своєй обласци.