СВИДНЇК – Коцурске Културно-уметнїцке дружтво (КУД) „Жатва” свою творчосц представело публики у Свиднїку, у Словацкей, на 62. Швету култури Русинох-Українцох Словацкей, дзе госцовало од 17. по 19. юний. Под уметнїцким руководительством Миколу Ґубаша, коцурски ансамбл на фестивалє виведол сценски приказ „Свадзба” и то було друге госцованє коцурского КУД на Швету култури, понеже на нїм участвовало и прешлого року.
Ансамбл „Жатви” на Свиднїцким фестивалє наступел всоботу, 18. юния, попри ище даскелїх госцуюцих ансамблох з України, як и числених ансамблох зоз Словацкей. У виведзеним сценским приказу рускей свадзби участвовали члени танєчней секциї вецей возростох, шпивацка ґрупа и оркестер „Жатви”.
??????????
Аматере КУД „Жатва” ше зоз Свиднїку врацели окреме задовольни з наступом и приємом, за цо окреме заслужни орґанизатор фестивалу Союз Русинох-Українцох Словацкей и його главни режисер Петро Беґенї.
На драги до Свиднїку Коцурци пияток, 17. юния, у Сабинове коло Прешова участвовали на їх локалним фестивалє, дзе ше представели з вецей точками у хторих тиж участвовал цали ансамбл.
Госцованє КУД „Жатва” на 62. Швету култури у Свиднїку орґанизовал Союз Руснацох Українцох Сербиї, чия делеґация тиж провадзела фестивал, а превоз до Словацкей обезпечела Општина Вербас, з окремним закладаньом заменїка предсидателя Општини Ксениї Бенце.
Фестивал провадзели и заменїк предсидателя Националного совиту Руснацох Йовґен Мудри и етнолоґ др Миряна Дєкич, котри там були и пре заверанє вистави о Руснацох Сербиї Заводу за културу войводянских Руснацох. Вистава була отворена у свиднїцким Доме култури од 27. мая по 17. юний, на законченю Фестивалу русинскей култури.
Як и дотераз, Швето култури у Свиднїку заєднїцки орґанизовали Союз Русинох-Українцох Словацкей, Прешовски самоуправни край, Место Свиднїк и Музей українскей култури у Свиднїку.
??????????