КОЦУР – Нєшка вноци, члени Културно-уметнїцкого дружтва „Жатва” одходзи на госцоване до Словацкей, дзе того викенду наступя на Фестивалу єдла и пица у Бардейове и на Фестивалу култури Русинох-Українцох Словацкей у Свиднїку.
Виводзацки танєчни ансамбл КУД „Жатва” у Словацкей наступи зоз штирома хореоґрафиями, шпивацку ґрупу и солистами, а провадзи их тамбурови оркстер. Попри Бардейова и Свиднїку, дзе буду наступац, Коцурци нащивя и Куров, понеже з тим валалом уж длуго пестую приятельски одношеня.
З ансамблом до Словацкей одходзи и подпредсидатель Националного совиту (НС) Руснацох Микола Шанта, члени Роботного цела за младеж НС Руснацох, як и делеґация Соязу Руснацох Українцох Сербиї, на чолє з подпредсидательом Велимиром Паплацком.