Кулску општину нащивел покраїнски секретар Оґнєн Бєлич

автор зам
887 Опатрене

КУЛА – Општину Кула вчера, 13. септембра, нащивел покраїнски секретар за реґионални розвой, медзиреґионалне сотруднїцтво и локалну самоуправу Оґнєн Бєлич, котри у розгварки з домашнїма, на чолє з предсидательом Општини Кула Перицом Видеканїчом, представел роботу свойого секретарияту и визначел приорити у наступним периодзе.

Предсидатель Општини Кула Перица Видеканїч покраїнского секретара упознал з витворйованьом актуалних и пририхтуюцих проєктох у општини, визначуюци же Општина Кула пририхтала проєкт за вибудов Поцискуюцого воду Червинка-Кула, як и за законченє вибудови индустрийней зони у Кули.

На схадзки догварене же и кулска општина пририхта найменєй 10 проєкти, з провадзацу документацию, же би ше заєднїцки дошло до средствох з других жридлох финансованя.

Покраїнски секретар Оґнєн Бєлич визначел же у фокусу новей Покраїнскей влади буду проєкти з обласци економского розвою, защити животного штредку и здравственей и социялней защити, а ресорни секретарияти буду координовац и стимуловац сотруднїцтво и повязованє општинох у заєднїцким конкурованю за средства.

На вчерайшей роботней схадзки з госцом з Покраїнскей влади присуствовали и заменїк предсидателя Општини Кула Кароль Валка, шеф Канцелариї за локални економски розвой Никола Жежель, директор ЯКП „Комуналєц” з Кули Дамян Милянич и шеф за инспекцийни роботи роботи и защиту животного штредку Општинскей управи Блажо Костич.

ПОВЯЗАНИ ТЕКСТИ