Фото: М. Афич

Чи сце знали же порядну наставу на руским язику маме у Руским Керестуре, Коцуре и Дюрдьове? Того школского року у тих трох местох маме коло 60 першокласнїкох – у Коцуре и Дюрдьове по єдно оддзелєнє, а у Керестуре аж три. Даєдни нови школярики нам виприповедали цо ше им найбаржей пачи у школи, а цо нє, хтори предмет им облюбени, яки маю гобиї и друге.  

Ана Тимко, Коцур: У школи ше ми барз пачи вельке товаришство у нашим оддзелєню. Ми ту як єдна фамелия. Вєдно учиме, бавиме ше и дружиме.Нє пачи ше ми кед ше дзеци бию и вадза.Найволїм годзини руского язика прето же любим писац букви и любим зоз учительку читац. Барз ми мили и годзини подобовей култури.Часто рециклуєм стари предмети, фляши, мещки, затички и зоз старого направим дацо нове.

Иван Чапко, Руски Керестур: У школи ше ми пачи кед ше учиме, дакус ше ми пачи и ужина и кед виходзиме вонка на длугши одпочивок. Нє пачи ше ми кед ше дахто побиє. Математика и анґлийски язик ми облюбени предмети. Ходзим на карате и на анґлийски язик.   

Лара Салак, Дюрдьов: У школи ми барз крашнє. Найволїм кед маме физичне, бо ше любим бавиц з лабду вєдно з пайташами. 

Катарина Бесерминї, Коцур: Найбаржей ше ми пачи у школи кед ше шицки вєдно учиме и крашнє бавиме. Нє пачи ше ми кед ше дзеци бию и ґураю и кед су барз нагнївани.Найволїм годзини руского язика и музичней култури. Любим крашнє рецитовац и шпивац.Найволїм ше дружиц з моїма милима товаришками и товаришом зоз оддзелєня.Любим зберац и пресовац квице и лїсца, та зоз нїх направим красни слики, або дацо инше. Часто тото цо направим и предавам.У шлєбодним чаше ше бавим зоз мачичку и пшичком, хторих барз любим.

Маша Дудаш, Руски Керестур: Найбаржей ше ми пачи вельки одпочивок, а найлєпши ми руски язик. Нє пачи ше ми кед робим чежки домашнї задаток. Дружим ше з Матейом, Стефаном и Давидом. Ходзим на атлетику, а дома ше бавим зоз моїма псами.

Филип Хромиш, Дюрдьов: Барз ше любим учиц у школи. Найволїм писац, алє любим и кед маме вельки одпочивок.

Виктор Малацко, Руски Керестур: У школи ше ми пачи кед маме годзини, поготов анґлийски язик, а найволїм предмет швет коло нас. Ходзим на анґлийски язик, а дома ше учим, лєбо помагам мами и татови.   

Христина Шовлянски, Коцур: У школи ше ми барз пачи же учиме дацо нове, же ше бавиме и шицки вєдно крашнє дружиме.Нє пачи ше ми кед ше дзеци вадза и бию.Найволїм годзину физичней и здравственей култури, а любим и годзину руского язика. Радосна сом кед ше дружим зоз мою учительку и зоз товаришом и товаришками зоз оддзелєня.Любим зберац квитки и пресовац их. Мам єдну кнїжку до хторей их лїпим. Ту записуєм як ше квитки волаю и кеди сом их отаргла. Любим мою мачку и єй мали мачатка.

Страхиня Йованович, Дюрдьов: Любим ходзиц до школи и ту ми барз крашнє. Найволїм кед маме годзини руского язика, понеже учиме букви.

Теодора Милинкович, Руски Керестур: Мнє ше пачи кед маме вельки одпочивок и кед виходзиме вонка, любим руски и анґлийски язик, а найволїм кед нам приду помагац школяре зоз пиятей класи. Нє пачи ше ми кед ше дахто биє, кед ше вадза, кед нє слухаю учительку и нє почитую правила у школи. Любим ходзиц на анґлийски язик, а у шлєбодним чаше ше бавиц зоз брациком Лазаром.

Матей Варґа, Руски Керестур: У школи ше ми пачи кед ше учим и кед на одпочивку бавим фодбал. Нє пачи ше ми кед нєт школи. Облюбени предмет ми математика. Ходзим и на фодбал и анґлийски язик, а вец ше дома бавим.

Сара Малацко, Руски Керестур: Пача ше ми годзини сербского язика и физичне, а нє барз любим анґлийски язик. Дружим ше зоз Ивонку. Ходзим на анґлийски язик, а дома ше лєбо учим, лєбо ше бавим зоз шестру.

Виктор Клашня, Коцур: Барз любим мойо товаришки у оддзелєню. Вони барз добри и крашнє ше зо мну дружа. Помагаме єдни другим. Складаме ше и почитуєме. Найволїм годзину физичней и здравственей култури и годзину музичней култури. Любим ше бавиц, шпивац и танцовац. Любим ше радовац. Нє любим кед ше дахто биє, вадзи и кричи. Дома зоз татом вше дацо майструєм и правим.