Мирон Жирош нам зохабел важни и вредни историйни дїла

автор мгк  фото вев
1.2k Опатрене

НОВИ САД – У просторийох Заводу за културу войводянских Руснацох у Новим Садзе вчера, 9. децембра, отримани Комеморативни сход пошвецени нєдавно упокоєному Миронови Жирошови. О його дїялносци и доприношеню нашей култури и лєпшому упознаваню нашей прешлосци бешедовали проф. др Янко Рамач, публициста Дюра Латяк, редактор часопису „Шветлосц” Микола М. Цап, редактор Видавательней дїялносци „Руского слова” Микола Шанта и новинар Велимир Паплацко, як и други присутни на сходзе.

Микола Шанта присутних поинформовал же єст людзох котри орґанизовано робели и робя на зачуваню скарбу и материялох Мирона Жироша, а НВУ „Руске слово” дотераз обявело и ище обяви його кнїжки.

Komemorativna shadzka MIRON ZIROS

О Жирошовей биоґрафиї и творчосци подробнєйше бешедовал Дюра Латяк, здогадуюци же вон бул учитель, ґлумец, режисер, моделар, правнїк, новинар у „Руским слове” и РТВ Войводини, привредни руководитель и судия-поротнїк, як и добитнїк числених наградох и припознаньох у нашей жеми и иножемстве.

Историчар проф. др Янко Рамач наглашел же Жирошово найвреднєйша робота то призначени историйни материяли з терену, так же його дїла и томи вельки рудокоп материялох хтори ше будзе ище длуго хасновац.

Новинар Велимир Паплацко акцентовал же дзекуюци Жирошови велї людзе у нашей жеми и иножемстве лєпше упознали свою прешлосц, хтору вон вредно призначовал.

6-Ziros-03

Редактор „Шветлосци” Микола Цап гварел же у тим часопису обявена Жирошова библиоґрафия, а вецей децениї обявйовани и його важни и вредни роботи – и за науку, и за обичних людзох, як то оценєли компетентни фаховци.

Ирина Гарди Ковачевич на вчерайшим сходзе пречитала пригодне писмо Леони Гайдук, котра здогадла же нїхто як Мирон Жирош нє прешол телї тисячи километри и нє нащивел телїх людзох и валали, же бизме цо лєпше упознали свой народ и свою прешлосц.

У мено Дружтва за руски язик, литературу и културу Ирина Папуґа надпомла же Жирош дал основи за дальши виглєдованя, а його робота була потримана и у Дружтве, док Агнетка Балатинац з Горватскей гварела же их Жирош учел робиц, алє нєпреривно сцел учиц и од других.

На концу вчерайшого сходу академик Юлиян Тамаш потвердзел же тото цо нам Жирош зохабел як найвреднєйше то його теренска робота и документи. Наглашел и же на тим Мирон Жирош робел сам, як даяки тим виглєдовачох, з добру историйну ориєнтацию.

Комеморативни сход, з хторим источашнє означена и 80-рочнїца народзеня Мирона Жироша, отримани на инициятиву Вивершного одбору Националного совиту (НС) Руснацох, а за тоту нагоду бул оформени и окремни Орґанизацийни одбор, у хторим бул и заменїк предсидателя НС Руснацох Йовґен Мудри.

Komemorativna shadzka MIRON ZIROS

ПОВЯЗАНИ ТЕКСТИ