БЕОҐРАД – Вирни у Беоґрадзе зишли ше у своєй церкви внєдзелю, 21. марца, кед на Служби Божей означели Задушну соботу, котра падала дзень пред тим.
У служби вирни ше помодлєли и одшпивали многолїтствиє владикови кир Георгийови Джуджарови, котри 19. марца наполнєл 20 роки як є з рукох святого папи Йоана Павла Другого у Риме пошвецени за владику, а потим пошол за помоцного мукачевского владику до Ужгороду.
Домашнї парох о. Владислав Варґа наглашел важносц исц за Исусом, як у нєдзельовей євангелиї наглашене, цо значи рушиц у тим чаше Вельконоцного посту по драги котру нам предклада Господь Бог.