ЧЕЛАРЕВО – У остатнїм колє першенства Окружней кадетскей лиґи, внєдзелю 6. юния, кадети Русину страцели од першопласованей екипи ЧСК зоз Челарева, з резултатом 4:1 (2:0), а єдини ґол за Русин дал Давид Надь.
Свидоми того же буду бавиц процив найлєпших на таблїчки, а ище и на госцуюцим терену, Русиновци ше заш лєм одважели пробовац поробиц дацо нєсподзиване. Но, нажаль, такой у 1. минути, направели такповесц, початнїцку гришку. Медзи двома бавячами нє була добра комуникация, односно, нє „порадзелиˮ ше хто вибиє лабду з вонка каребного простору, та ю обидвоме пущели. Лабда ше лєм „прешейталаˮ коло нїх, и у тей хвильки, процивнїцки бавяч прибегнул и послал лабду до ґолу. По словох тренера Зденка Шомодїя, кед ше уж на самим початку пре даяку баналну гришку „подаруєˮ ґол процивнїкови, окреме такей моцней екипи, после резултат барз чежко надокнадзиц.
З оглядом же хлапцом зоз Челарева тото змаганє було змаганє за шампионску титулу, мож повесц же бавели вельо осторожнєйше, орґанизованше зоз барз мало гришками, а на концу заслужено и победзели.
Кадети Русину наступели у составе – Матео Чордаш, Тадей Бодянец, Александар Зорич, Марио Иличич, Теодор Няради, Божидар Чонка, Неманя Ковачевич, Лука Иличич, Андрей Дудаш, Александар Тома, Давид Надь, Алексей Бики, Марко Попов, Желько Стричко и Кристиян Надь.
Ґол за Русин дал Давид Надь.
После нєдзельового змаганя, кадети Русину першенство закончели на високим 6. месце, од вкупно 10 екипох.