НОВИ САД – На Перши дзень Крачуна по юлиянским календаре, штварток, 7. януара, у новосадскей церкви св. апостолох Петра и Павла дополадня служена Архиєрейска Служба Божа, хтору предводзел преосвящени владика Георгий Джуджар, а сослужел новосадски парох о. Юлиян Рац.
У казанї наш апостолски еґзарх кир Георгий гварел же Господ Бог у милосердию на жем послал свойого сина, прейґ котрого придзе спашенє и одкупенє людскому роду, цо наша радосц и Бог приходзи же би з нами жил и остал навики. Владика визначел и же тот рок Святи рок – Рок милосердия, и тирва по 20. новембер 2016. року, а у нїм вирни годни достац и полни одпуст грихох.
На Архиєрейскей Служби шпивал и Хор церкви св. апостолох Петра и Павла и Руского културного центру, а було и мированє.
На Вилїю пред найрадоснєйшим церковним шветом, пополадню и у Новим Садзе по квартельох и обисцох наших людзох було колядованя и винчованя, а пририхтована и традицийна шветочна вечера.
Всеночне пред Крачуном у новосадскей церкви було на 21 годзин, а предводзел го владика Георгий Джуджар, зоз сослуженьом новосадского пароха о. Юлияна Раца.
Як то уж постава традиция, по Всеночним у полней церковней сали св. о. Миколая було друженє и колядованє Новосадянох, хторе на ґитари провадзел дзияк Йовґен Надь.