ОСИЄК (ГОРВАТСКА) – Културно-уметнїцке дружтво Руснацох Осиєку на соботу, 3. децембра орґанизує 12. Стретнуце хорох и шпивацких ґрупох „Дравски габи”.
„Дравски габи” у Осиєку буду у просторийох ОШ „Антон Миханович” (Ґундуличова 5А), почню на 17 годзин, а як наявене, участвую руски шпивацки ґрупи з Петровцох (два), Миклошевцох, Вуковару, Винковцох, Риєки, Заґребу, Райового Села и Осиєку, та як госци шпивацки ґрупи КПД „Дюра Киш” зоз Шиду и Матки словацкей з Осиєку.
Манифестацию ше отримує з финансийну потримовку Совиту за национални меншини Републики Горватскей и Осиєцко-бараньскей жупаниї, а поволани и представителє з политичного, културного и вирского живота Осиєку, Осиєцко-бараньскей жупаниї, националних меншинох, як и Руснацох у Горватскей.
КУД Руснацох Осиєку роби уж 33 роки, а як информує його предсидателька Агнетка Балатинац, перши документи о Руснацох у Осиєку записани 1930. року.
По програми будзе и заєднїцке друженє учашнїкох, госцох и публики, а манифестация „Дравски габи” тиж єден зоз способох очуваня Руснацох у Осиєку и Горватскей, алє и представяня їх роботи Осиєчаньом и другим националним меншином у тим городзе.