БЕОҐРАД – З нагоди Медзинародного дня людских правох – 10. децембра – на соботу у Беоґрадзе будзе орґанизоване окремне представянє шицких 20 националних меншинох у Сербиї хтори орґанизовани прейґ националних совитох (НС) и Єврейскей општини. Представянє, з назву „Мозаик Сербиї”, орґанизує Канцелария за людски и меншински права Влади Републики Сербиї, у сотруднїцтве з националнима совитами националних меншинох.
То будзе перши раз же у Сербиї Медзинародни дзень людских правох будзе означени и з вельку манифестацию пошвецену припаднїком националних меншинох, хтори ше представя з културну програму, информативну, образовну и видавательну дїялносцу, як и зоз своїма националнима кухнями, народним облєчивом, старима ремеслами и другима змистами.
Попри на заєднїцкей културно-уметнїцкей програми, Руснаци на окремним штанду буду представени и прейґ НВУ „Руске слово”, Заводу за културу войводянских Руснацох, Основней и штреднєй школи з домом школярох „Петро Кузмяк” з Руского Керестура и здруженя женох „Байка” з Керестура и „Бикичанки” з Бикичу.
„Мозаик Сербиї”, як свойофайтови „саям” националних меншинох на соботу, 10. децембра будзе у гали 3А Беоґрадского сайму од 10 до 16 годзин, а шветочне отверанє будзе на 11 годзин.
Як дознава Рутенпрес, з нагоди Медзинародного дня людских правох и представяня националних меншинох на Беоґрадским сайме, и популарна ТВ-емисия РТС „Жикина шареница” на соботу, 10. децембра, од 9 до 11 годзин будзе пошвецена меншином. У емисиї КУД „Тарас Шевченко” з Дюрдьова „на живо” виведзе єдну руску шпиванку.