КУЛА – У Рамикох Културней манифестациї „Костельникова єшень” всоботу, 19. новембра у Кули отримане Стретнуце рецитаторох, а домашнї програми у ОШ „Петефи бриґада” и того року було Руске КУД „Др Гавриїл Костельник”. Присутних привитал предсидатель РКУД Владимир Бучко, а Мишана шпивацка ґрупа Дружтва одшпивала два руски народни шпиванки, под руководительством Еуфемиї Планкош.
Модераторка програми Амалия Ковач визначела же „Костельникова єшень” того року у знаку 130-рочнїци народзеня Гавриїла Костельника и здогадуюци на живот и роботу др Костельника, наглашела же вдерел фундамент „за хижу руского язика”, зохабел нам вельки капитал, а надпомла же Стретнуце рецитаторох и у знаку 20 рокох од початку роботи кулского Руского КУД. Ковачова пречитала и єден виривок з Костельникового идилского венцу „З мойого валала”.
На Стретнуцу реитаторох того року участвовали двацецеро рецитаторе з наших местох – у младшим седмеро, штреднїм 11-еро и двойо у старшим возросту.
У младшим возросту рецитовали Лара Сопка з Кули, Леонора Ґайдош з Вербасу, Иван Молнар з Дюрдьова, Филип Хромош з Коцура, Кристина Дюранїн з Дюрдьова, Мария Жирош з Кули и Катарина Недич з Коцура.
У штреднїм возросту наступели Лїляна Кнежевич з Кули, Милица Михальовски з Дюрдьова, Наталия Жирош з Кули, Валентина Салаґ з Дюрдьова, Силвия Маґоч з Коцура, Дияна Канюґа з Кули, Валентина Михняк з Дюрдьова, Дариа Чордаш з Коцура, Микола Еделински з Руского Керестура, Єлена Горняк з Дюрдьова и Матей Шепински з Керестура.
У старшм возросту рецитовали Мирослав Малацко з Керестура, котри того року рецитує за Руски културни центер з Нового Саду и Тимеа Будински з Керестура, того року шеста на Републичней смотри рецитаторох у Валєве.
У музичней часци програми Стретнуца рецитаторох наступели Лара Сопка на клавиру и Лїляна Кнежевич на гармоники, обидва школярки Школи за основне музичне образованє Кула.