БУДАПЕШТ (МАДЯРСКА) – У Будапешту, у Уряду омбудсмана, стреду, 14. септембра отримани сход з назву „Зашеданє на чесц академика Антония Годинки”, на хторим свойо викладаня виложели унук Антония Годинки – руководитель травматолоґийного оддзелєня др Ласло Годинка, грекокатолїцки владика др Атанас Орос, подкарпатоязикознавец з Береґгазкого мадярского институту др Иштван Черничка, доц. историї др Йожеф Болтика з Будапешту и руковидитель Русинского наукового институту при Русинскей националней самоуправи у Мадярскей др Михаил Капраль.
Академик Антоний Годинка бул визначни слависта, историчар, академик Мадярскей академиї наукох, ректор Печуйского универзитету и почесни предсидатель Подкарпатского здруженя наукох. Народзени є 7. фебруара 1864. року у Ладомирове, у нєшкайшей Словацкей, а умар 15. юлия 1946. року у Будапешту. Русинска самоуправа у Мадярскей запровадзела и Награду „Антоний Годинка”, хтору ше додзелює Русином заслужним за досяги у вецей обласцох.
Конференция на чесц академика Годинки отримана под покровительством представительки Русинох у мадярским парламенту Вири Грицовей и омбудсманки Мадярскей Ержебет Салайне Шандор.
У рамикох програми руководитель Музейней секциї при Русинскей националней самоуправи Мадярскей др Золтан Кламар отворел виставу Атанаса Фединца, а на спомнутих подїйох бешедовал и державни секретар за церковни, народносни и цивилни питаня Микловш Шолтес.