РУСКИ КЕРЕСТУР – Гуманитарна акция Нєдзеля Каритасу, з мотом „Зоз солидарносцу победзиме индивидуализем”, вчера означена и у рускокерестурскей парохиї св. оца Миколая, а до дзвончка за тоту нагоду назберани 23 120 динари.
У шицких штирох службох Божих о. Михайло Шанта у казанї потолковал прецо значне думац и на других, так же и Каритас твори цала церковна заєднїца. Даровани прилоги до дзвончка буду похасновани праве за помоц фамелийом котрим то найбаржей потребне.
У просторийох Каритасу у Керестуре вчера дополадня отримани и традицийни Крачунски вашар и як гварели його организаторе, волонтере Каритасу, бул барз добре нащивени.
На Вашаре могло купиц крачунски прикраски, лакотки, колачи и друге, а нащивителє як добродзечни прилог, тиж за людзох котрим то потребне, подаровали 3 660 динари.