СЕРБИЯ – Нєшка, 11. новембра, державне швето – Дзень примиря у Першей шветовей войни, як спомин на шицких нєвино настраданих медзи 1914. и 1918. роком. У Сербиї швето першираз службено означене 2012. року, на основи вименкох Закона о державних и других шветох, хтори Скупштина Сербиї прилапела концом 2011. року. Нєшкайше швето и нєроботни дзень.
Дзень примиря у Першей шветовей войни у Сербиї будзе означени з вецей рижнима манифестациями, а вчера пополадню на чесц швета на Савскей тераси Беоґрадскей твердинї виштрелєни дзешец плотуни зоз шейсц артилєрийских орудийох, з найвисшима воєнима почесцами, интонованьом державней гимни и подзвигованьом державней застави.
Як главни мотив за означованє того швета у нашей жеми ше хаснує Наталийову ремонду, квеце хторе загрожена файта у Сербиї, а познате є и як квеце-феникс. Попри того, у амблему и мотив пантлїки Албанскей памятнїци.
Дзень примиря у Першей шветовей войни медзинародне швето и у жемох Заходней Европи ше го означує на 11 г., як здогадованє на 11. новембер 1918. року, кед на 11 г. на моц ступело примирє хторе Нємецка подписала зоз силами Атланти, и з тим закончени нєприятельства на Заходним фронту.