КУЛА – З Вечаром камерней музики Ансамблу „Билитис” з Нового Саду, у Кули нєшка, 17. октобра, почина 16. Музична манифестация „Єшень идзе бишалмо моя (Јесен стиже дуњо моја) – Днї Иси Баїча”. Нєшкайши концерт будзе на 19 годзин у Концертней сали Школи за основне музичне образованєе (ШОМО).
Манифестация по 7. новембер будзе мац ище штири програми на вецей локацийох, та на соботу, 29. октобра будзе Вечар соло-шпиваня и тамбурашскей музики, на хторим участвую баритон Милош Радович и Тамбурашски оркестер „Зоруле” з Нового Саду, а програма будзе у велькей сали Културного центру (у театру).
На вовторок, 1. новембра, тиж у велькей сали Културного центру будзе Вечар композицийох Исидора Иси Баїча и представянє кнїжки „Огляднуце на роботу Исидора Баїча у театру”. Участвую Хор и Оркестер Ґимназиї „Йован Йованович Змай” з Нового Саду и автор кнїжки Светозар Радуйко. На пияток, 4. новембра, у Концертней сали ШОМО будзе Вечар гушлї и клавиру, а граю Ивана Ґруїчич (гушля) и Невена Радованович (клавир).
Манифестация будзе закончена на пондзелок, 7. новембра, з Вечаром духовней шпиванки и представяньом кнїжки „Патриярх Павле, святитель котрого зме познали” Дьордя Ранделя. Остатня програма будзе у кулскей сербскей православней церкви, а попри спомнутого автора кнїжки, участвує и Хор „Исидор Баїч” з Нового Саду.
Шицки спомнути програми починаю на 19 годзин, а покровитель манифестациї Општина Кула