ОСИЄК – Нєшка, 17. юния, почина Дзевята Подобова колония КУД Руснацох Осиєк, а участвую подобово уметнїки з Горватскей и Сербиї (Войводини).
З Горватскей, пре завжатосц, участвую лєм двоме уметнїки – Мирослав Одавич и Роберт Ерделї, док з Войводини шицки котри поволани – Лидия Барна, Владимир Дороґхази, Тамара Барановски, та Серафина и Силвестер Макайово.
У рамикох Колониї на ютре вечар у просторийох КУД Руснацох Осиєк будзе литературне стретнуце, на хторим зоз своїма творами наступя Серафина и Силвестер Макайово.
Подобова колония будзе отримана у апартману „Цесарица” (Добрише Цесарича 10), коло трох осиєцких паркох, а будзе заверта на нєдзелю, 19. юния на 11 годзин у спомнутим апартману. Попри викладаня подобових роботох витворених на Колониї и представяня малярох, на завераню наступи и КУД Руснацох Осиєк.
Отримовцанє Подобовей колониї финанцийно потримує Совиту за национални меншини Републики Горватскей.