ҐОСПОДЇНЦИ – Нєшка, 29. юлия, у Ґосподїнцох почина робота 12. Подобовей колониї „Стретнуце у Боднарова”, а на нєдзелю, 31. юлия, будзе отримана и 15. Дзецинска подобова колония. Подобову колонию орґанизує Дружтво за руски язик, литературу и културу.
Подобова колония „Стретнуце у Боднарова” нєшка будзе отворена на 16 годзин у ОШ „Жарко Зренянин” у Ґосподїнцох, дзе и ютре и на нєдзелю буду робиц учашнїки на Колониї, а у Школи на нєдзелю, 31. юлия, на 10,30 г. там почнє и 15. Дзецинска подобова колония.
У рамикох Колониї, у Подобовей ґалериї у Ґосподїнцох у Месней заєднїци буду виложени роботи з прешлорочней Подобовей колониї „Стретнуце у Боднарова”, хтору провадзи и окремни каталоґ, а учашнїки на Колониї виставу орґанизовано нащивя на нєдзелю на 12 годзин.
Колония на нєдзелю будзе закончена на 15 г. з додзельованьом подзекованьох учашнїком.
Тогорочну Подобову колонию „Стретнуце у Боднарова” ше отримує у знаку 120-рочнїци народзеня Сави Шумановича и 80 рокох од народзеня Гелени Крклюш Фейди, подобовей уметнїци з Ґосподїнцох.